( الله يخرب بيتك يا محسن )
موظف غلبان دخل السوبر ماركت يشترى زيت ، سأل : - بكام الزيت ده ؟
- 11 جنيه
- الله يخرب بيتك يا محسن .
- بكام كيلو الرز ؟
- 4 جنيه
- الله يخرب بيتك يا محسن .
وفضل الراجل الغلبان يدور على أى حاجة يشتريها ، حتى لو مش عايزها ، أى حاجة بس تكون رخيصة يا خلق هوه .. من بقالة لسوبر ماركت لسوق لصيدلية ، حاجة واحدة رخيصة غير البنى آدم يا عالم ، وكل مرة يدعى من قلبه : الله يخرب بيتك يا محسن .
وطبعا ماكانش حد عارف مين محسن ده ، لكن لما حكايته انتشرت وسيرته بقت على كل لسان ، راح مخبر ابن حلال ماشى وراه وسمع بودانه فعلا الراجل وهو بيشد فى شعره ويقول : الله يخرب بيتك يا محسن ..
شده المخبر من قفاه لقسم الشرطة وطبعا طول السكة هراه احترامات لما قفاه بقى شوارع ، وهناك سأله الباشا الظابط : هه عملت إيه يا ابن الكلب ؟
- والله يا باشا ما انا عارف .
- دلوقتى هتعرف يا روح أمك .
وبأمر الباشا الظابط أخد الطريحة التمام ومع كده فضل يصرخ ويقول والله ما عملت حاجة يا باشا ، طب قولى بس جريمتى إيه ..
ولما الباشا غلب حماره فيه قال هاتولى مخبر الغبرة اللى جابه ، وسأل الباشا مخبره القرارى فحكى له الحكاية كاملة وقال إنه سمعه بودانه ألف مرة وهو بيقول :
- الله يخرب بيتك يا محسن .
ومرة تانية غلب حمار الباشا فسأل المخبر الفكيك فين المشكلة بالظبط ؟
انتفض المخبر اللوذعى : يا سنة سوخة يا سعادة الباشا .. ده يستحق الحرق يا باشا ..
بقول لجنابك بيقول الله يخرب بيتك يا محسن !! .. ازاى ابن الكلب ده مايعرفش اسم الريس ؟!! .
* هذه ( بتصرف ) آخر نكتة سمعتها وبعد أن انفجرت ضاحكا وتعجبت من المواطن المصرى الذى لم ينس النكتة فى الأيام السوداء هذه وكعادته يسخر حتى من نفسه ،
سألت نفسى هل حقا الرئيس هو المسئول عن ذلك ؟ لا أعتقد .. المشكلة يا سادة أكبر من هذا والشخص المسئول عن كل شيء قريب جدا منكم جميعا .. لا أود الإطالة أكثر ،
اقرءوا قصتى القصيرة جدا هذه وهى قديمة جدا ربما منذ عشر سنوات وأكثر ..
" جُبن " ( قصة قصيرة جدا )
امتلاء الطرقات بالجثث .. اندلاع الحرائق فى الشوارع والقلوب .. تسمم ذرات الهواء .. قتل العصافير وشنق الأحلام والأشجار .. اغتصاب ضحكات الأطفال .. إطفاء ضوء القمر ... هذا الجبان – وحده – مسئول عنها .. أرفع السكين تجاهه و ... أقتلنى.
3 التعليقات:
السلام عليكم ورحمة الله وبركاته...
الاخ الكريم ايهاب رضوان ...
بالطبع هو مسئول و سيحاسب ايضا علي ما اوصل اليه الشعب من ذل و هوان و مهانة ...
اذا صلح الحاكم صلحت الرعية واذا فسد الحاكم فسدت الرعية ... فسدت الرعية بسبب الحاكم الذي لا يهتم بمصالح شعبه .. فسدت الرعية بسبب الحاكم الذي قتل الرجولة وزرع الذل في نفوس الشعب .. فسدت الرعية بسبب الجبن الذي زرع فيها من قبل بطانة الحاكم بطانة السوء ..
اولا تحية لك أخ أيهاب على مدونتك التى راقت لي كثيرا
و اتفق معك على ان الشعب المصري لا ينسى النكته حتى فى احلك لحظات حياته فهكذا يحاول ان يهونها على نفسه او لنقل يضحك على نفسه قبل ان يضحك عليه الاخرين
اما عنك اخ شاندرا فاسمح لي ان اتفق و اختلف مع فى ان واحد
نعم كل راعي مسئول عن رعيته و سيحاسب علي افعاله و فساد الراعي من فساد الرعية و لكن هل هذا ينفي ان الرعية نفسهم سيحاسبون على صمتهم امام فساد الراعي؟
هناك مسئولية كبيرة علينا نحن الرعية ايضا و كما نطالب بحقوقنا علينا ان نقوم بواجباتنا
بالتوفيق للجميع
عزيزى " صمت المكان "
شكرا لتشريفك مدونتى ومديحك الذى أرجو أن أستحقه . أرق المنى .
إرسال تعليق