عمر وباسل

Your pictures and fotos in a slideshow on MySpace, eBay, Facebook or your website!view all pictures of this slideshow

الثلاثاء، 11 أغسطس، 2009

( زهرة فى حضن الجبل )



صحراء جرداء بصهدها اللافح وجوها الموحش المفعم بالوحدة والقسوة .. بينما هى واقفة برقة شامخة .. زهرة برية فى حضن الجبل .. زهرة يانعة مترعة بالندى كأنما سقتها يد بستانى للتو بإفراط .. براقة زاهية بكل ألوان البهجة والمرح الطفولى .. عبيرها يفوح فى المكان بأريج خاص خلاب ومنظرها يبعث الحياة فى ذلك الموات والفراغ الموحش ، فإذا بالصحراء تصير مروجا خضراء تنبثق فيها ينابيع كثيرة صافية وتملأ قطرات الندى المكان فترفع يديك المبللة منه تمسح وجهك فى انتشاء ..
هذا المشهد هو ما تبقى بذهنى بعد أن غادرتنى تلك الفتاة .. تلك البنت المصرية شديدة التميز : ( ميادة رشاد بيوتيفول ) .. أو ( ميادة رشاد جميل ) كما تقول الأوراق الرسمية ..
هى واحدة من الفتيات المصريات التى تنفى فكرتك عن تفاهة الجيل الحالى وسطحيته .. كنت قد سمعت عنها باعتبارها قريبة زوجتى وكانت تدخل المدونة هنا لتقرأ كثيرا وتعلق أحيانا ومنذ يومين التقيت بها لأول مرة .. كنت على وشك مغادرة المكان واستحلفتنى هى أن أبقى وأبيت الليلة لنجلس ونتحدث .. فلم أندم على البقاء ..
طلبت منى ألا أفهمها خطأ فأفهم أنها تريد الحديث معى باعتبارى كاتبا أو شخصية شهيرة ، بل على العكس لكى تمنحنى شرف الجلوس مع شخصية عظيمة مثلها .. خفيفة الدم جدا بلا افتعال وذكرتنى على الفور بشخصية ( نسيم الروح ) فكلاهما من نوع البنت المجنونة العاقلة جدا .. اتصلت ميادة بيوتيفول بوالدتها تستأذنها فى التأخير قليلا فسمحت لها بالتأخير حتى العاشرة والنصف ولكن فيما يبدو أن ساعتها كانت على توقيت الصين لأن السهرة طالت وهى ولا هنا ..
المرح يشع من كلماتها وروحها القوية المتفائلة إلى حد ما قبل العبط بقليل جدا ..
هى خريجة جامعية حديثة ، تخرجت فى كلية الهندسة واختارت تخصصا نادرا للفتيات وتبحث عن عمل بطموح كبير أدعو الله ألا تفقده .. حدثتنى عن المدونة والمواضيع التى قرأتها والعبارات التى أثرت فيها وظلت تذكرها ، وعن طموحاتها و ( سميرة موسى ) التى تمنت أن تكونها منذ التحاقها بالكلية .. انطلقت قفشاتنا سويا بلا انقطاع ووجدتنى أغير رأيى فأدعو الله بأن يرزقنى بطفلة مثلها ذات يوم وقررت لحظتها أن أتحدث عنها هنا مسجلا اندهاشى بها ، مصحوبا بكثير من الدعاء والأمنيات لها فى حياتها الخاصة والعملية .. وأيضا ببعض النصائح وأهمها : الصبر .. وألا تترك طموحها يتحطم على صخرة الواقع المرير .. فستقابلين الكثير جدا يا ميادة .. ستكونين على صواب والجميع حولك يعلمون ذلك وسيطلبون منك فعل الخطأ .. سيكون عقلك متفتحا وناضجا ومتفهما لحقائق كثيرة ولكنهم سيطلبون منك أن تخلعى عقلك وتمشى حافية ، أو على الأقل سينصحونك ب " تكبير الدماغ " .. ستحاولين الصراخ وتقولينها زاعقة فى وجوههم : لأااااااااااا .. لكنها لن تصل إلى آذانهم سوى نعم خاضعة .. وقتها أتمنى ألا تفقدى آمالك وطموحك والأهم مرحك وشقاوتك وأدعو الله عندما نلتقى ثانية يوما ما ، أن أجدك دوما هكذا كما رأيتك بكل رونقك .. زهرة برية جامحة لا تذبل .. زهرة فى حضن الجبل .

هناك 19 تعليقًا:

أم بتول يقول...

ربنا يحفظها ، و يحفظ روحها الرقيقة المرحة و يحقق طموحها و أمالها التى تريديها ، و أدعو الله لها ألا تتحطم على صخرة واقع مرير ، و أن شاء الله يرزقك الله ابنه مثلها و تكون بيوتيفول جدا جدا جدا و الأهم أن يكون العقل هو البيوتيفول .
حمد لله على سلامتك و عودتك لمصر و أن شاء الله تكون اجازة سعيدة ، وكل سنة و انت طيب و بخير بمناسبة شهر رمضان أعادة الله عليك و على ألسرة الكريمة بكل خير .

فاتيما يقول...

Hjبتمنالها زى العزيزة ام بتول ما م بتتمنى ...
إنها تثبت و تفرح و تنجح و لا تخيب رجاء أحد فيها
بس كمان الدنيا متخيبش رجائها هى الأخرى
و عقبال ما تكون عندك عروسة زيها
أنا ليل عتاب عندك
ممكن اقوله ؟
طيب
سيادتك فى أجازة ..مجيتش ليه لقاء المدونين بتاع حديقة الازهر ؟!!
طب نتعشم نشوفك فى حفل توقيع الشاعر مصطفى حسان بكرة فى مكتبة البلد
تعالى نتونس بيك و تشرفنا
كل الود ليك

إيهاب رضوان يقول...

شكرا أم بتول وفاتيما وليسامحنى الجميع فليس لدى نت فى المنزل فى مصر وأكتب دوما من السايبر .. فاغفروا لى الغياب والتأخير ..

إيهاب رضوان يقول...

يبدو أن زهرتنا التى فى حضن الجبل نائمة ملء جفونها فى حضن الجبل .. إيه يا ميادة لو مفيش معاكى جنيه تروحى سايبر قولى إحنا اخوات برضه وأكيد هشوف حد يسلفنا سوا ..

غير معرف يقول...

انتبه هنا مياده رشاد بيوتيفل.

لا لا لا الكلام ده كبييييييييييير جدا يا نهار ابيض ايه الكلام الجميل ده انا او كنت اعرف كنت اختلقت نت من تحت الارض والله لو الكلام ده فعلا بجد موش مجامله ده انا المفروض ما اتكلمش مع حد خلاص كفايه على كده.
بجد شكرا يا أستاذ ايهاب على الكلام ده لكن لان حضرتك اديب وحسك مرهف كتبت ده لان حضرتك بتشوف كل شئ جميل وليس لانى كل هذا .
اما عن الطموحات والامال فعلا انا بادئه احس ان فيه حاجه موش مظبوطه بتحصل هى ايه؟ او هتخلص امتى؟ موش عارفه.لكن الحمد لله من نعمه ربنا على انه وهبنى النسيان لكل شئ يضايق فمثلا يوم ان التقيت بحضرتك كنت قد جلست مع العزيزه أميره وكانت قعدت فضفضه وكانت الدموع هى بطلة القعده ولكن بمجرد ما قعدت معاكم ولا كأن فيه حاجه وفعلا مع ان عيناى كانت على الساعه الا انى كنت باشوفها ولا أهتم.والحمد لله جت سليمه مع ماما .وبجد كان يوم مميزجدا جدا جدا.مع انه بدأ كيوم محبط ولكنه انتهى بالامل وبذكرى ساظل اتذكرها دائما هى رؤيه شخص حضرتك الكريم .فعلا المرح الذى يصل أحيانا الى العبط ده هو فعلا الشئ الوحيد الذى يعطينى الدفعه لانى ومع كل ما يحيط بى اشعر وكان هناك شئ كويس جاى ايه هو ؟بردو موش عارفه......
وعلى فكره انا بالفعل فكرت لو عند حضرتك بنوته اكيد هتكون طيب جدا وعطوف جدا عليها وده والله كل اللى تحتاجه اى بنت خاصه من الاب ربنا يرزقك....امين.
أشكرك جزيلا على كلامك الرقيق واعتذر عن عدم الرد سريعا.واشكرك بالتحديد على العنوان الجميل الذى ارجو ان اكون استحقه(زهره فى حضن الجبل)

حسن ارابيسك يقول...

إيهاب وحشني كتير واللهي
زهرة في حضن الجبل
اعتقدتها في البداية قصة قصيرة ففرحت لكن بعد قليل أكتشفت انها إشارة صادقة وعلامة خطأ لكل من يظن ويعتقد بأن هذا الجيل فارغ من الداخل ولا يملك شيئاً لأيامه القادمه
وعلامة صح
لكل من يثق في هذا الجيل ويستبشر خيراً
تحياتي

غير معرف يقول...

ايهاب

وقعت بالصدفة على مدونتك وفكرتني بحاجات مضت وجاوبت على اسئلة كانت محيراني..

انا مين

انا واحدة من الاتنين اللي قابلوكم انت وست الحزن في كنتاكي لما رجعت من ايطاليا

وعرفت بعد كام سنة انها ماتت وفضل الموت لغز معرفتش افسره لحد لما جيت انت وفسرته
وكمان محمود سليمان الولد المعجون بالندى والحلم الله يرحمه

على فكرة قبره جنب قبر والدي انا كمان والموت بيحصد الكل
لعل في الاخره سلوى ليهم

اخبار د. عمر ايه؟
يمكن علاقتي كانت اكتر بست الحزن هي اللي عرفتني عليكوا وهي دخلتني العالم ده بس بعد التخرج علاقتني تقريبا انقطعت بيها لحد يوم كنتاكي\

الله يرحمها هو اعظم واحن من اي حد هي ومحمود وكل المسلمين

امل

إيهاب رضوان يقول...

أمل إدريس حسبما أذكر ؟ أليس كذلك ؟ ..
منورة الدنيا ورغم أننى فى حالة سيئة لا تسمح بالكتابة إلا أننى فرحت جدا بوجودك هنا فقد أخذتنى من يدى إلى أيام جميلة وبائسة ولت ..
فاكرة نجف والبغل وشارع جيهان والكشرى واللمة والندوات ومكتب د. عمر ؟..
د. عمر بخير وعلاقتى متصلة به رغم السنوات ورغم سفرى للإمارات وقد رأيته منذ 3 أسابيع قبيل عودتى إلى الغربة وهو كما هو جميل كعادته ..
علاقتى بكثير من الأصدقاء استمرت بفضل الله .. الفرعون رفيق ومحمود صالح وهلال لا يزالون أحبتى وأعز أصدقائى .. فاكرة كمان بهية ياسين ؟ بخير ..
احكى لى كيف عرفت مدونتى بالصدفة وماذا قرأت بها؟ ست الحزن فقط وهل قرأتها كاملة ؟ .. سمعت صوتها ؟.. فاكرة يوم كنتاكى زيي ؟.. تعرفى أخبار حد من الزميلات القدامى ؟ أنت ماهى أخبارك وحياتك ؟ أسئلة كثيرة وحنين فجرهما وجودك السعيد .. ماتقطعيش الجوابات والبيت بيتك هنا .. سلامى لمصر كلها وبلقاس العزيزة مش انتى منها ؟ أنا كنت هناك من شهر كنا بنعمل كتاب شريف صقر صديقنا اللى مات برضه ..آااااه .. ما أبأس هذه الدنيا ..
رب لك الحمد كما ينبغى لجلال وجهك وعظيم سلطانك

إيهاب رضوان يقول...

العزيز حسن أرابيسك
مرحبا بك يا غال .. أنا معتكف شوية ومتغيب عن التدوين وكل المدونات .. واحشنى أكتر ..
خالص حبى .

Zianour يقول...

ازيك يا ايهاب

مش معقول انت فاكرني.ز رغم اننا لم نتحدث كثيرا
لما شفت صورتك افتكرتك انت اتغيرت شوية وقعدت افحص في المدونة والتدوينات عشان اتأكد انه انت ولقيت كل الاخبار .. والاجابات

مش هتتصور يوم كنتاكي ده فضل محفور جوايا ليه (رغم شهرتي في النسيان والزهايمر) البنت دي قد ايه يومها كانت هشة متكسرة وحزينة بدرجة مش معقولة

كل اللي قالته ليا مشاكلها مع جوزها ورغبتها في الطلاق وابنتها بانسيه و"جواها" اللي فضل زي ما متغيرش رغم الوقت والسنين وجواها ده فهمته على انه الشعر والشخصية العنيدة الحساسة اللي متعرفش المراوغة

محمود كمان موته كان أسى ما بعده اسى

انا لسه محتفظة بكروت جميلة صممها لياوكمان اخد كل العك اللي كنت باكتبه وجاب كراسة وكتبه بكل جمال ورتب لي الورق .. يااااه ذكريات معجونةبالرماد والالم والمرارة مش عارفة ليه!!!!

انا دلوقتي في كندا بقى لنا سنة وشوية عندي نور وزياد والحمد لله على كل حال

اتذكركم بكل الود والحنين
ولا انسى "ست الحزن" ولا اابتسامة محمود وقلب العصفور الذي كان يمتلكه واحيانا تلح علي من وسط ركام الحياة صورتهما محمود باتسامته العذبة ورقة وجوده و"ست الحزن" بهشاشتها ولخبطة وجودها التي احيانا اشعر انها كانت متعمدة منها...
اتذكر هذه الخيالات العنيدة الشفيفة التي مرت بحياتي ولا افهم لماذا لا ترحل مع الاسى الذي يخلفوه داخلي

المهم كيفك انت ؟؟ وبلغ " دخل الربيع" تحياتي وبوس اولادك ربنا يخليهم لك
مش معايا برضه ان الاولاد هما اجمل حاجة ممكن تحصل للبني ادم مننا؟؟؟ الحياة في طورها الاول بكل الطزاجة والجهل الجميل المنعش والفطرة الخضراء التلقائية؟؟

انا مش فاكرة بهية قوي او لو شفتها اتذكرها انا علاقتي كانت بشكل خاص مع ست الحزن ومحمود وفاكره رفيق اللي فعلا كان رايق والحقيقة انني مريت بسرعة على التدوينات من امبارح للنهاردة
بس كويس انك بتعافر

انا ابتعدت عن كل حاجة لحد سنتين تقريبا لما عملت مدونتي انا كمان وهي اللي رجعتني شوية شوية للعالم اللي بنحبه وبرضه اللي مودينا في داهية!!!!

طولت عليك

اتمنى لك كل الخير والصلاح وان يبارك الله لك في اولادك وحياتك
واكيد انشاء الله هاطل عليك

Zianour يقول...

انت حالتك سيئة ليه كفى الله الشر؟؟

يا رب يقويك

انا عرفت المدونة عن طريق الجميلة حبيبة قلبي فاطيما اعزها الله بجد انا مشفتهاش بس بحبها جدا والله

يا خبر نسيت كمان محمود صالح -مدرس عربي حاليا فيما اظن- بلغه سلامي

الحقيقة ان الشلة دي كانت شلة عجيبة الاقدار !!!!

Zianour يقول...

صباح الخير يا ايهاب
احيك بشده على المدونة الجميلة والقصص القصيرة البالغة الحرفية...
وخاصة التوت المحروق ..عجبني فيها السرد والصور والشخصيات والحبكة ...بجد انا سعيدة اني اكتشفت مدونتك وكمان مقالاتك الاخرى ...احساسي هو انك مصري اصيل معجون بارض البلددي وطينها وفاهم فولتها واخرها ...وده شىء مدهش ومحير برضه!!!!

طبعا انا باهزر ...

ربنا يوفقك والى الامام

بس عايزين حاجة جديدة بقى

وشكرا جدا على تعليقك عندي .. وطبعا احنا على قدنا جدا يعني وباحاول على قدي

منور الدنيا ومنتظرة الجديد

تحياتي

إيهاب رضوان يقول...

Zianour ..
شكرا أستاذة أمل لتواجدك .. وأرجو ألا يكون تعجبك من كونى فاهما على حد تعبيرك معناه أن شكلى يوحى بالعبط مثلا .. أشتاق فعلا للكتابة فى مدونتى وقريبا سيحدث هذا فلتوى أفقت من عدة مشاكل أهمها أنه حدث لى حادثان بسيارتى الجديدة فى أسبوع واحد بعد أيام قليلة من شرائها ولكن الله سلم بحمد الله فلا خسائر فى الأرواح .. فقط ألملم عدة أشلاء مبعثرة وأعود للظهور ..
وجودك يسعدنى كثيرالأنه يذكرنى بالأيام الخوالى فأنت من ( ريحة الحبايب )فلا تتغيبى ..
تحياتى .

Zianour يقول...

هههه

لا طبعا انا مش قصدي اطلاقا اللي فهمته

انا بس من خلال القصص شعرت بمدى فهمك لطبيعة المصري الصميم والصميم دي فيها اختلاف كبير بس لا يوجد على الاطلاق اي نيه للسخرية

لما قلت مدهشة كان قصدي الرسوخ في الفهم وعدم الحيرة والاضطراب

هذا ما اوحيت لي به القصص

اما الحوادث فربنا كريم وقضاء اخف من قضاء ... وربنا يحفظك ويحفظ من تحب

واطمن انا هابلط هنا في المدونة


كل التحية

غير معرف يقول...

أحم أحم يارب ياستار
هنا مياده رشاد
كل لما افتح المدونه أجد أن زهره فى حضن الجبل هى الأخيره وطبعا أنا مقدره ده جدا لأن طبعا حضرتك لما تكتب عن مياده رشاد لازم تحتار هتكتب ايه بعدها كان الله فى عونك ازاى هتكتب حاجه بالروعه دى تانى.........
لأ نتكلم بجد شويه أين أنت يا أستاذ ايهاب ايه الغيبة دى وبعدين لما انتو موش اد العربيات بتجيبوها ليه؟؟؟
انا موش عارفه اودى وشى فين لو حد من الصحافه عرف ان قريبى موش عارف يسوق حتة عربية يبقى ايه موقفى فى الامم المتحدة!!!!!!!!!
ألف سلامة عليك يا أستاذ ايهاب وان شاء الله تكون الاصابات بسيطه ويارب تكون اتعلمت القيادة بقى ...انت فى الامارات وحصل كده فلو جيت تقود فى شوارع مصر الجميله هيبقى ايه الحال؟؟؟
المهم طبعا مشتاق تعرف أخبارى بدون كلام.أنا ظللت أبحث على شغل وأسافر القاهرة وأروح مقابلات ولا حياة لمن تنادى ...
المصنع ياخد أبناء العاملين مره ومره موش عاوز حريم ومره اعلان فى الجرنال بس الوظايف مشغوله فعلا .......الخ.
المهم وصلت لمرحلة انى قربت أروح اتعالج نفسيا الى ان اتى الفرج واشتغلت فى شركه جديده كويسه فى مصر الجديده لكن لازم فترة تدريب عشان ابدأ اخد مرتب معقول والعمل بعيد شويه عن الدراسه لكن أهو اشبط فى أى شغلانه لحد ما ربنا يفرجها....أدعى لى .
المهم بجد خد بالك على نفسك وسلم لى على الاولاد وحبيبة قلبى طبعا وقول لها ان اسمها جميل واحنا فى أكتوبر.
وعاوزه أقول كلمه أرجو أن تتقبلهامنى أرجو منك أن تكتب على طول موش تبطل وموش كل شوية تبقى مكتئب لأنك مبطل كتابة من قبل الحادثة ...أنا بأفكر ايه ممكن يكون بيضايقك يعنى ؟؟ايه اصلا يستاهل انه يضايق الكاتب الكبير؟؟
الحياة والعيشه والمستقبل !!!!!!!!
عيش اليوم بيومه وفكر ازاى تسعد يومك وتسعد زوجتك واولادك ولاتفكر فى المستقبل أقصد فكر فيه صح لأن فيه فرق كبيير بين الاهتمام بالمستقبل والاغتمام به.
أو جايز الماضى الصعب لسه شبحه حاضروهو ده اللى بيضايقك؟ تأكد ان كل الصعب اللى كان فى حياتك الماضيه عدى خلاص وانك فعلا تخطيته كله أهو ولسه عايش وقوى لأن ممكن أى حد تانى ماكانش يعدى منه...
يبقى ايه بقى ممكن يضايقك ؟؟؟؟؟؟
يا سلام انا باقول حكم والله.
أرجو بجد أنك ما تكونش اضايقت من كلامى واسفه لو كنت سمحت لنفسى بكده..
بس بجد أرجو من الله انك وعيلتك الجميله تكونوا بخير على طووووووووووول
وكفايه كده لانى طولت عليك
وتانى ألف سلامه عليك
وسلامى الدائم الذى لا ينتهى أبدا....
ميادة رشاد بيوتيفل

إيهاب رضوان يقول...

مرحبا ميادة بيوتيفول ..
مش حكاية إنى مش عارف أكتب حاجة بعد موضوعى عنك .. لكن ماكنتش راضى أكتب علشان كل ما أفتح مدونتى يفضل موضوعك إنتى الأول لكن ما دمتى أصريتى فهكتب حالا موضوع جديد بافكر فيه من أيام ..
ثانيا مين قال إنى محبط أو مكتئب ؟ الحمد لله هو الإحباط العادى العام ولا يمكننى التفاؤل إلا لو كنت عبيطا مثلك فلنقل إننى لست متفائلا بكل ما يحدث حولنا ولكننى لست مكتئبا ..
وبعدين مين قال لك إنى مابعرفش أسوق السيارة؟ ده بس هو النصيب وأنا أحسن واحد ( يسوق فيها ) وحياتك الحادث التانى اللى حصل لى كنت واقف بالسيارة ولا بيا ولا عليا يا أم أحمد يا اختى وإذ فجأة جت واحدة ست تحفة زيك وخبطتنى من ورا .. طيب اعمل ايه ..
مبروك على الشغل وربنا يستر على الشركة دى منك ويا رب يكون عندك إنترنت حاليا ..
على فكرة مش معقول واحدة زيك باشمهندزة كبيرة لما تيجى تعلق فى مدونتى تعلق كغير معرف ، فأنا عملت لجنابك حساب فى جوجل وكمان مدونة عشان تقدرى تعلقى باسمك وحسابك ويمكن تتهبلى وتفكرى تكتبى فى مدونتك وتنافسينى ماهى ناقصاكى .. ده رابط مدونتك الفاضية طبعا
http://mayadabeautiful.blogspot.com
ممكن تنسخى الرابط وتلصقيه فى مكان العنوان فى صفحة النت وتدوسى إنتر فتروحى المدونة ، طبعا باشرح لأنى عارفك عبقرينو ..
ولما تيجى تعلقى فى المدونات تختارى خيار حساب جوجل وتكتبى حسابك ده
mayadabeautiful@hotmail.com
وطبعا فيه كلمة مرور هبعتهالك رسالة على الموبايل عشان سرية .. وإياكش يتمر ..
روحى الآن اقرى موضوعى الجديد وعلقى باسمك الخاص ..
حرب أكتوبر بتسلم عليكى هى والعيال ..

الكريمين يقول...

انجاز رائع اتمنى لك مزيدا من التقدم والازدهار

غير معرف يقول...

حلوة

غير معرف يقول...

سيحبك الاف غيري وستستلمين بريد الشوق
لكنك لن تجدي بعدي.. رجلا يهواك بهذا الصدق
لن تجدي ابدا.. لا في الغرب ولا في الشرق
فاكر الابيات دي؟ طيب تقدر تعرف انا مين؟ لو عرفت متقولش اسمي.. قول كلمة سر ميعرفهاش غيرنا.. ولو معرفتش متكتبش تخمينات.. وفي الحالتين.. دمت بخير